من اليوم وبالطالع لما تصلوا ما تطلبوا من الرب إنو يحسن الوضع والأمور تروق أو إنو تتغير بس هالطبقة الحاكمة.. صلوا وطلبوا إنو تتحقق عدالة السما عهالأرض، بكل معنى الكلمة لو كان التمن حريق البشرية لو كانت هالعدالة بدا تقتص بدايةً من كل واحد منا.. الترقيع ما بيفيدنا، واذا مفتكرين إنو الحكام بس هني الفاسدين بتكونوا ما عم تعملوا نقد ذاتي وفحص ضمير.. لأنو الصيدلي منو سلطة واحتكر الدوا وصاحب محطة البنزين منو حاكم وخبا المحروقات تا يغلى سعرا وصاحب السوبرماركت منو موظف رسمي وغلى البضاعة قبل ما يخلص المخزون لشاريه عالأسعار القديمة و قرر إنو يرسمل مصلحتو وبضاعتو الجديدة عحساب كل شخص منكن، و بياع التياب كذلك الأمر والخضرجي وبياع الأسمدة الزراعية لباع الملح على إنو سماد زراعي وبياع الزيت لعم يغش بالزيت وتاجر الجملة واللحام لعم يبيع لحم حمير والميكانيسيان لبيبيعك القطعة المستعملة عالدولار والسنكري لما عاد رحم الناس صاحب الفرن لكان يجيب الطحين المدعوم وبيعك ياه أضعاف حقو، والطبيب لباع اللقاح ماي وملح وقبض تمن لقاح حقيقي، وإدارات المدارس لغلت الأقساط وما قدمت بالمقابل شي للأساتذة لمش قادرين يكملوا بكرامة والمستشفيات لما استقبلت ولا مريض ما دفع مصاري مسبق و شركات التأمين يلي إلن سنين يجمعوا ثروات بإيام الخير وما وقفوا حد المرضى لما احتاجوهن والبنوك لنهبوا جنى عمر الناس وما رفلن جفن.. والموظف لبيرتشي تا يمرق معاملة غير مستوفاية شروطا ويأخر ميّة غيرا محقين، والقاضي لما تدخل وقت اللزوم ومنع السرقة والإحتكار وكانت عدالتو مغيبي قصراً.. وكلنا مش من عدا حدا منا كل واحد بمجالو كنا عم ننهش بعضنا ونكذب عا بعضنا بطمعنا وأنانيتنا.. صدقوني الفساد معشعش فينا كلنا.. وعدالة السما لازم تتطبق عالكل والنار تطهر الكل لأنو أسفل الهرم لو ما كان ملوث بالفساد ومصبوغ بالخطية ما كان الراس المسؤول ويلي بموقع السلطة قبل بالترقيع والإحتكار والهوان والسكوت وغض النظر والظلم والغش والسمسرة والتهريب.. الخ يا رب حقّق عدلك فينا كلنا، عدلك غمر عظيم، ونحنا كلنا ارتكبنا الخطية وكنا أدوات للشر ورضينا بالظلم وما كان عنا رحمة.. و يلي لوصلنالو اليوم هو نتيجة بعدنا عن وصاياك و عن العيش بنعمتك، كان ساكننا الطمع والجشع والغيرة والخبث والشر والنوايا المبيتة..نحنا كنا عم نطلب منك تزيدنا غنى مادي لأنو ما عم نشوف غير المال سبيل للعيش والتسلط باب للسعادة والقوة مصدر للحياة.. نحنا لنسينا عطاياك الحقيقية ونعمك لبتحيينا.يا رب، حقق عدلك، لأنو بغير عدلك مافي حياة جديدة ولا خلاص تام، آمين.
يا رب…حقق عدلك
